موغان طايفالاريندان اولان پولادلو طايفاسىنين ضييالي بير قاديني عظمت خانيم آديندا، ائلات طايفالارينى بيرلشديرمه يي دوشونوردو. او، مييانادان آرازا كيمي هر نه طايفا وار ايدي ائلچي گؤندريب و اونلاري بيرلييه چاغيردي. همين گونلرده رضاخان پهلوي ساريسيندان نوروز بيگ آدلي بيري، طايفالارا باشچي سئچيلميشدي و آغ بوروندا طايفا باشچيلارينى شاه فرمانيني آلماق اوچون دعوت ائتميشدي. بو توپلانتىدا جواد خان، حاجي عليلو طايفاسي باشچىسي، عظمت خانيمين بيرليك مكتوبونو چيخارديب و اوخويور. نوروز بيگ آجيقلانير و خانلارا « بير قاديندان نه ساياق سؤز ائشيتمك اولور؟» دئييب، اونلاري رضاخانا ساري چاغيرميشدي. آنجاق خانلاردان بير سايىسي نوروز بيگه بعلي دئميشلر و بير سايىسي عظمت خانيما ساري گلميشديلر.

نوروز بيگده، چوخلو توپ – توفنگ وارميش و عظمت خانيم نهضت-ى جنگل (ميرزا كوچك خان) باشچيلارينا٬ ها بئله شازدا ميرزا (لنكران خانلاريندان) و تاليش و خالخال خانلارينا مكتوب يازير و اونلاردان ايمداد ايسته يير. آز زاماندا بير مجهز اوردو حاضيرلايير و دوشمانلاري (روس –رضاخان و ارمني اردوسو) موغان چؤلوندن قووور. رضاخان بير مجهز اوردو٬ سروان داوودخان و مختار نظام باشچىليغى ايله عظمت خانيمين برابرينه گؤنده رير. عظمت خانيمين اوردوسونا ايبـيش خان – قليـنج خان – جوروق خان (عظمت خانيمين حيا ت يولداشي) – جوزي خان و فيروز خان (عظمت خانيمين اوغلانلاري) باشچيليق ائديرديلر. ايلك محاربه ده سروان داوود خان هلاك اولدو. ايكينجي محاربه ده رضاخان اوردوسو آغير توپلار و مسلسللرله هوجوما گيردي. ائل محاربه چيلري چاديرلاريندا توپلار آلتيندا هلاك اولدولار. عظمت خانيم توتولوب و اردبيلين نارين قالاسينا سورگون اولدو. اوغلو فيروز خان 1308 ده تبريزده تيرباران اولدو. امير عشاير خالخالا ساري قاچيب و اورادا بير پارا توفنگچينى باشينا ييغيب نارين قالايا هوجوم مقصدينده ايدي. آمما خبرچيلر تئزدن بيليب و امير عشايري توتوب، تبريزه آپاريب و بير ايل سونرا اورادا اعدام ائتديلر. عظمت خانيمين ائوي «آلار» دا يانديريلدي و بو محاربه ده اؤلنلرين سايىنى 200 نفر يازيبلار. عظمت خانيم تكجه قالان بالاجا اوغلو، جوزي خانلا، عؤمرونون سون گونلرينى اردبيلده گؤز آلتيندا سوودو. و نها يت 1312 ده وفات ائتدي. اونون قوچاقليغي و ايگيتلييى هله ده ائل آراسيندا تمثيل كيمي گئديري. روحو شاد اولسون!